Krama Banjar Adat Tegenan Kelod, Desa Adat Tegenan,sajeroning nampenin pituduh guru wisesa Gubernur Bali manut sewalapatra saking edaran MDA Prov.Bali,SE No.: 007/2021/MDA BALI, Tgl.02-08-2021 indik Aci Pakelem Hulu Teben ring Manca Segara, sane medue tetujon mangda Ida Sanghyang Widhi Wasa mepaica wara nugraha antuk nyapuhaken sehananing mala merana Covid 19 ring jagate saha kahuripan mewali paripurna kadi nguni utamanipun kahuripan krama Desa Adat Tegenan.
Nabdabin indike punika klian Banjar Adat Tegenan Kelod Mk.Manik kesarengin Mk.Kt.Kania Pemangku Pr.Dalem, .sampun presida ngemargiang upacara pemendak Tirta Pengrapuh Jagat sane ketunas ring Besakih olih Jero Bendesa duk rahina Sukra Wage Wayang,6 Agustus 2021.Benjangne nemonin Tumpek Wayang galah jam 16.00 Wita megenah ring Pr Dalem,Mk.Manik Puspa Yoga,meprekanti sareng Paiketan Istri Dharma Patni,Paiketan Serati Banten Sekar Wangi lan KWT Mekar Wangi ngaryanin bakti piuning lan pemendak,kesaksi antuk petajuh Bendesa I Ketut Wana Yasa, A.Md.Par. sampun presida nibakang tirta punika ring krama Adat melarapan suang-suang Dadia,lantur ring dadia ketibakang ring kramanyane suang-suang mangda nenten akeh kramane mepupul ,mangda nenten piwal saking protokol kesehatan.
Ring galahe punika Mk.Manik nugesang pisan, mangda krama sami setata eling nunas ica lan ngemargiang sehananing napi sane ketitahang olih sang angawa rat pamekas indik dudonan ngemargiang protokol kesehatan punika sampunang pariboya. Taler ketelatarang indik tetujon lan tata titi ngemargiang tirta sane pacang nyejer abulan pitung rahina ngawit saking Tumpek Wayang 7 Agustus 2021 ngantos 18 September 2021,inggian ring Padma Pura Kahyangan Desa,naler ring merajan krama suang-suang. Sesampun rauh ring jero suang-suang tirta punika kependak kelinggihang ring padma lantur wusan muspa tirta pengrapuh jagat ke ketisang ring pekarangan kelanturang ngemargiang tirta Pelukatan sepisanan ketunas taler ring lebuh tengen kegenahang seselet pinaka cihna utawi pinget.
Indik pemargi yasa kerti selawas Ida Betara Tirta nyejer,ketugasang mangda krama sareng kalih ngerahina megiliran ngaturang bakti ring Pura Dalem genah tirtane nyejer,punika taler ring suang--suang Dadia mangda katitenin oleh krama dadianyane melarapan pewarah klian dadia,baos Mk.Manik.
Ketut Wana Yasa pinaka petajuh Bendesa ngaturang dahatin suksma ring krama Paiketan istri,serati lan KWT MekarWangi sane sampun presida ngayah mereresik lan ngaturang bakti pejati peyasan lan pemendak sapisanan ngemargiang pesangkepan suang suang,tityang ngangganin krama Desa Adat ngaturang suksmaning manah antuk kelascarian ibu-ibu sareng sami.
Ring galah punika taler presida rauh dane Jero Gede Krisnadana pemangku Betara Gede Sakti ,Jero Mk.Sudiastawa pemangku Pr.Dalem Suci,Klian Dadia Ibu Kanginan I Ketut Wana yasa,Klian Dadia Ibu Kawan I Made Mustapa,utusan Dadia Dukuh Segening Jero Megeng,Dadia PejenenganNi Wayan Ngenik,Dadia Pasek Gelgel I Komang Selahdana,Klian Dadia Pasek Kubakal Putu Surata,Klian Dadia Pulasari Guru Wayan Suweca,Klian Dadia Tangkas Kuriagung Guru Wy.Suparta, Klian Banjar Dinas Tegenan sepisanan Ketua Satgas C19 Mk.Gede Tangkas Wiguna,miwah sane siosan.
Dumadak sangkaning pemargi yasa kerti puniki sedaging jagat presida rahayu dwaning sehananing merana pakeweh urip musnah saking mercapada,mewetu raris landuh kerta raharja pemargin kahuripane,ajeg sekadi jati mula. (manixs).
Parikrama Mendak Tirta sareng Bendesa,Sukra WageWayang,6 Agustus 202
Tidak ada komentar:
Posting Komentar